Germaniya terma jamoasining sobiq himoyachisi Lotar Matteus Xarri Keynni maqtadi. Sobiq futbolchi "Bavariya" hujumchisining kuchli tomonlarini aytib o‘tdi. Matteusning fikricha, myunxenliklar tezroq hujumchi bilan shartnomani uzaytirishi kerak.
"Hozircha Xarri Keyndan yaxshiroq forvardni ko‘rmayapman. U nafaqat gollari bilan, balki universalligi, maydonda kerakli pozisiyalarni egallay olishi bilan ham qadrli. Keyn o‘zini to‘p uzatuvchi, driblingchi va himoyachi sifatida ko‘rsatadi.
Erling Xoland yoki Kilian Mbappe jarima maydoni ichida Keyn kabi podkat qilganini yoki 50 metr va undan ortiq masofaga uzatma berganini ko‘rmaganman. U markaziy hujumchi rolini qayta ko‘rib chiqdi, xuddi Manuel Noyer darvozabonlar o‘yini haqidagi tushunchani o‘zgartirgani kabi. Uning shartnomasi 2027 yilgacha mo‘ljallangan. Men kelishuvni imkon qadar tezroq uzaytirishni tavsiya qilgan bo‘lardim," deb aytgan Matteus.
