"Barselona" klubining boshqa jamoalar oldidagi umumiy qarzi taxminan 159 million yevroni tashkil etadi, deb xabar bermoqda Foot Mercato nashri.

Futbol klubining moliyaviy ahvoli hanuz tang holatda. Prezident Joan Laporta tomonidan klub iqtisodiyotini barqarorlashtirish uchun aktivlarni sotish va tijoriy kelishuvlar orqali ko‘rilgan choralarga qaramay, «Barselona» La Liga moliyaviy feyr-pley qoidalariga rioya etishda qiynalishda davom etmoqda.

Manba ma’lumotlariga ko‘ra, o‘tgan mavsum yakuniga ko‘ra «Barselona» soliqlar to‘langanidan so‘ng 17 million yevro miqdorida zarar qayd etgan. Klub a’zolari bilan bo‘lib o‘tgan yig‘ilishda rahbariyat so‘nggi yillardagi transferlar bilan bog‘liq Yevropa jamoalari oldidagi qarzlar haqida hisobot taqdim etgan.

Ma’lumotlarga ko‘ra, katalon klubi hali ham «Manchester Siti»ga Ferran Torres uchun 13 million yevro, «Bavariya»ga esa Robert Levandovski uchun 10 million yevro qarzdor.

Eng yirik to‘lovlar Dani Olmoning transferi bilan bog‘liq — yaqin muddatda 19 million yevro va uzoq muddatda yana 15 million yevro to‘lanishi kutilmoqda. Shuningdek, «Barselona» Braziliyaning «Paranaense» klubiga Vitor Roke uchun 17 million yevro to‘lashi lozim.

Jami transfer qarzlari 159 million yevroga yetgan. Kreditorlar ro‘yxatiga fransuz klublari ham kirgan: «Bordo» — Jyul Kunde tayyorgarligi uchun 359 ming yevro, havaskor «La Bred» klubi esa 80 ming yevro olishi kerak. Shuningdek, «Renn» klubi Rafinya transferi bilan bog‘liq 32 ming yevro to‘lovni kutayapti. «Barselona» esa hali ham «Lids» jamoasiga ushbu futbolchi uchun 42 million yevro qarzdor hisoblanadi.