«Barselona» prezidenti Joan Laporta «Real Madrid» televideniyesini “el-klasiko” oldidan hakamlarga bosim o‘tkazayotganlikda aybladi. Uning ta’kidlashicha, madridliklar hakamlik xatolarini tahlil qiluvchi videolar orqali vaziyatga ta’sir o‘tkazishga urinmoqda.

«Hammamiz ajoyib o‘yinni kutayapmiz. Biz ishonamizki, jamoamiz muxlislarni xursand qiladi. Biroq raqibimiz maydondan tashqarida hakamlar atrofida keskin muhit yaratishga harakat qilmoqda. Ular o‘z televideniyesi orqali hakamlarga ta’sir ko‘rsatmoqda. Bu g‘alaba uchun to‘g‘ri yo‘l emas. Ular hakamlar bizga yordam beradi deb da’vo qila olmaydi. Biz o‘zimizni jabrdiyda sifatida ko‘rsatmaymiz va yana «Bernabeu»da g‘alaba qozonish uchun harakat qilamiz», — dedi Laporta "Marca" nashriga bergan intervyusida.