«Barselona» bosh murabbiyi Xans-Diter Flik «Elche»ga qarshi 3:1 hisobidagi g‘alabadan so‘ng Lamin Yamalning sog‘ligi haqida ma’lumot berdi.
18 yoshli vinger yakshanba kuni bo‘lib o‘tgan uchrashuvda «ko‘k-anorranglilar»ning birinchi goliga mualliflik qildi.
«Lamin juda intizomli o‘yinchi, holati barqaror, ammo uning muammosi hali butunlay yo‘qolgani yo‘q — davolanishni davom ettirish kerak. U shifokorlar ko‘rsatmalariga to‘liq amal qilmoqda. Ammo, afsuski, hali ham ozgina noqulaylik his qilyapti, shuni inkor etib bo‘lmaydi», — dedi Flik o‘yindan so‘nggi intervyusida.
Eslatib o‘tamiz, Lamin Yamal so‘nggi haftalarda son suyagi sohasida og‘riq his qilmoqda, shuning uchun u hozircha jarrohlik amaliyotidan voz kechgan.
