Yakshanba kuni «Inter» A Seriyaning safar uchrashuvida «Verona»ni 2:1 hisobida mag‘lub etdi. Ushbu o‘yinda jarohatdan sog‘aygan hujumchi Markus Tyuram yana «neradzurrilar» qaydnomasiga kiritilmadi.
«Markus sog‘lom, lekin hali formaga kirishi kerak. Biz uni safarga olib ketmaslikka qaror qildik, chunki baribir uni maydonga tushirmas edim. Menga faqat to‘liq tayyor futbolchilar kerak. O‘zim ham futbolchi bo‘lganman, jarohatlar olganman — agar uchta mashg‘ulotdan keyin maydonga chiqsangiz, qayta jarohat olish xavfi katta bo‘ladi. Men bu xatoni hech qachon takrorlamayman», — deya «Inter» matbuot xizmati Kivuning so‘zlarini keltirgan.
Markus Tyuram sentyabr oxiridan beri birorta o‘yinda qatnashmagan.
Eslatib o‘tamiz, chorshanba kuni «Inter» Chempionlar ligasida Qozog‘istonning «Qayrat» klubiga qarshi bahs olib boradi.
