Якшанба куни «Интер» А Сериянинг сафар учрашувида «Верона»ни 2:1 ҳисобида мағлуб этди. Ушбу ўйинда жароҳатдан соғайган ҳужумчи Маркус Тюрам яна «нерадзуррилар» қайдномасига киритилмади.
«Маркус соғлом, лекин ҳали формага кириши керак. Биз уни сафарга олиб кетмасликка қарор қилдик, чунки барибир уни майдонга туширмас эдим. Менга фақат тўлиқ тайёр футболчилар керак. Ўзим ҳам футболчи бўлганман, жароҳатлар олганман — агар учта машғулотдан кейин майдонга чиқсангиз, қайта жароҳат олиш хавфи катта бўлади. Мен бу хатони ҳеч қачон такрорламайман», — дея «Интер» матбуот хизмати Кивунинг сўзларини келтирган.
Маркус Тюрам сентябрь охиридан бери бирорта ўйинда қатнашмаган.
Эслатиб ўтамиз, чоршанба куни «Интер» Чемпионлар лигасида Қозоғистоннинг «Қайрат» клубига қарши баҳс олиб боради.
