Бир неча кун олдин Килиан Мбаппе ўзини Усмон Дембеле билан таққослади. Мбаппе Дембеленинг барча томонидан иқтидорли футболчи сифатида эътироф этилганини, ўзини эса «танланган» футболчи деб ҳисоблашганини айтган эди.

Шундан сўнг Дембеле ҳам бу фикрга жавоб қайтариб, фаолияти давомида кўп меҳнат қилгани ва ҳеч қачон «танланган» футболчи бўлмаганини таъкидлади.

Гарчи футболчилар ўртасида очиқча можароли ҳолат юзага келмаган бўлса-да, L’Equipe маълумотига кўра, Дембеле Мбаппенинг сўзларидан норози бўлган. Футболчилар 15–16 ёшларидан буён дўст бўлиб келади, аммо Килианнинг айтганлари Усмонга ёқмаган.

Манба таъкидлашича, Дембеле Мбаппенинг сўзларидан биринчи марта норози бўлаётгани йўқ. Сўнгги йилларда Килианнинг айрим баёнотлари бир неча бор Усмоннинг ғашига теккан.

Шу билан бирга, Мбаппе ва Дембеленинг оммавий ахборот майдонида бир-бирига жавоб қайтариши давом этмаслиги таъкидланган.