«Каттақўрғон» бош мураббийи Илёс Зейтуллаев ўзбекистонлик футболчиларга Европа клублари томонидан қизиқиш борлигини таъкидлади.
«Европа клублари ўзбекистонлик футболчилар билан қизиқишмоқда. Италия клублари, мураббийлари ва скаутлари қизиқиш билдиряпти. Фақат италияликлар эмас. Инглиз ва испан клублари билан ишлайдиган таниш скаутлар ҳам бор», — деди Зейтуллаев Eurasia Football нашрига берган интервьюсида.
Мутахассиснинг таъкидлашича, хорижлик клублар футболчиларнинг нафақат жисмоний имкониятлари, балки характери, ахлоқий фазилатлари, хулқ-атвори, меҳнатга муносабати ва ўйинни ўқиш қобилиятини ҳам ўрганмоқда.
«Кўплаб футболчиларимиз аллақачон топ-чемпионат вакилларининг эътиборида. Улар футболчини комплекс равишда ўрганишмоқда», — деди у.
Зейтуллаев ўзбек футболчилари орасида Италиянинг А ва B серияларида ўйнай оладиган футболчилар борлигини ҳам қайд этди.
