«Kattaqo‘rg‘on» bosh murabbiyi Ilyos Zeytullayev o‘zbekistonlik futbolchilarga Yevropa klublari tomonidan qiziqish borligini ta’kidladi.

«Evropa klublari o‘zbekistonlik futbolchilar bilan qiziqishmoqda. Italiya klublari, murabbiylari va skautlari qiziqish bildiryapti. Faqat italiyaliklar emas. Ingliz va ispan klublari bilan ishlaydigan tanish skautlar ham bor», — dedi Zeytullayev Eurasia Football nashriga bergan intervyusida.

Mutaxassisning ta’kidlashicha, xorijlik klublar futbolchilarning nafaqat jismoniy imkoniyatlari, balki xarakteri, axloqiy fazilatlari, xulq-atvori, mehnatga munosabati va o‘yinni o‘qish qobiliyatini ham o‘rganmoqda.

«Ko‘plab futbolchilarimiz allaqachon top-chempionat vakillarining e’tiborida. Ular futbolchini kompleks ravishda o‘rganishmoqda», — dedi u.

Zeytullayev o‘zbek futbolchilari orasida Italiyaning A va B seriyalarida o‘ynay oladigan futbolchilar borligini ham qayd etdi.