Элит Осиё Чемпионлар Лигасининг 1-турида “Нефтчи” Ироқнинг “Эйр Форс” клубини қабул қилди. Кескин ва муросасиз кечган баҳсда фарғоналиклар 1:0 ҳисобида зафар қучди.
Жамоалар ўйинни эҳтиёткорона тарзда олиб борди ва узоқ вақт давомида ҳисоб очилмади. Учрашув тақдирини эса захирадан майдонга тушган футболчилар ҳал қилди. 56-дақиқада Ян Медейрос ўрнига ўйинга қўшилган Зоран Марушич 83-дақиқада ғалаба голини киритди. Коффи Куао ўнг қанотдан тўпни жарима майдончасига ажойиб тарзда узатиб берди, сербиялик ҳужумчи эса уни бош билан дарвозага аниқ йўллаб, “Нефтчи”га ғалаба келтирди.
Қолган дақиқаларда ҳисоб ўзгармади ва Исломбек Исмоилов шогирдлари Элит Осиё Чемпионлар Лигасидаги дастлабки ғалабасини тантана қилди.
“Нефтчи” мазкур ғалаба эвазига мусобақадаги илк 3 очкосини қўлга киритди. Фарғоналиклар мусобақанинг 2-турида Саудия Арабистонининг “Ан-Насср” клубига қарши майдонга тушади. Мазкур беллашув 12 октябрь санасига белгиланган.
Элит Осиё Чемпионлар Лигаси, 1-тур
“Нефтчи” (Ўзбекистон) — “Эйр Форс” (Ироқ) 1:0
Гол: 1:0 — Марушич (83).
“Нефтчи”: Ботирали Эргашев, Боян Сигер, Икромжон Алибоев, Аброрбек Исмоилов (Билолхон Тошмирзаев, 46), Нурмуҳаммад Абдуғаниев, Стипе Перица (Хуршид Ғиёсов, 72), Алишер Одилов, Ян Медейрос Сассе (Зоран Марушич, 56), Фаррух Сайфиев, Коффи Франк Куао, Франциско Журани.
“Эйр Форс”: Муҳаммад Солиҳ Межбел, Руслан Ханоон Ал-Дарражи, Муслим Муса Ал-Ҳамадани, Саэд Аҳмад Алросан, Моҳанад Абдулкадҳим Ал-Жебур, Алҳарет Ал-Саег (Мужтаба Моҳсин Сваеди, 63), Муҳаммад Жавад Алғадаб (Ҳайтам Жуини, 83), Аббас Фавзи Ҳасан, Саад Абдуламеер, Твисила Кисинда (Мурад Муҳаммад Субеҳ, 63), Али Саад Жаббар (Мозес Оркума, 72).
