O‘zbekiston U-17 terma jamoasi bosh murabbiyi Islombek Ismoilov bugungi bahs xususida fikr bildirdi.

"Og‘ir kechgan o‘yinda g‘alaba qozondik. Bunday turnirlarda raqibdan avval hayajonni yengish talab etiladi. Buning ustida juda ko‘p ishlar olib bordik. Lekin, shunga qaramay, o‘yin davomida yosh futbolchilarda hayajon sezilib turdi.

Hisobdan kelib chiqib o‘yinni nazorat qildik. 2:0 hisobida oldinda borayotganimizda kerakli paytda himoyalanishni ham bildik. Bu oldindan o‘ylangan reja edi. Futbolchilar murabbiylar shtabi tomonidan belgilangan ko‘rsatmalarni to‘liq bajarishdi. Buning uchun ularga o‘z minnatdorchiligimni bildiraman.

Raqib jismoniy jihatdan o‘ta kuchli jamoa. Shundan kelib chiqib biz taktik va o‘yinni tezlashtirish choralarini reja qilgan edik. Birinchi taymda bu rejalar amalga oshdi.

Bu futbol. Unda esmosiyalar bo‘ladi. Shu paytgacha JCHda o‘tkazilgan deyarli barcha futbolchilar emosiyalarga boy o‘tyapti va unda ba’zi futbolchilar qizil kartochka ham olyapti. O‘yindan oldin biz bu narsalarni tushuntiramiz, shogirdlarni ogohlantiramiz. Futbolchilarning ruhiy holati bo‘yicha ishlaymiz.

Eng muhimi g‘alaba qozonish edi. Bugun futbolchilar buni uddalashdi", — dedi Ismoilov.