Superliga 28-turidan o‘rin olgan Surxon - Sho‘rtan (1:0) uchrashuvidan so‘ng mezbonlar ustozi Fevzi Davletov matbuot anjumanida ishtirok etdi.

— O‘yin haqida fikringiz?

— Birinchi taymda yetarli darajada vaziyatlar yaratdik, faqat foydalanish kerak edi. Shunda ikkinchi bo‘lim biz uchun yanada oson o‘tardi. Tanaffusdan keyin ham barqaror o‘yin namoyish etishga harakat qildik, sabr qilib oxirigacha kutdik. 1:0 hisobida g‘alabaga erishdik va navbatdagi uch ochkoni qo‘lga kiritdik. Harakat qilishda davom etamiz. O‘ylaymanki, hammada kayfiyat yaxshi. O‘yin og‘ir bo‘lishini futbolchilarga aytgandik, chunki "Sho‘rtan" asosiy etiborni himoyaga qaratishini bilardik. "Sho‘rtan" bilan o‘yinlar oson bo‘lmayapti deb bemalol ayta olaman.

— Asilbek Jumayev ikkinchi bo‘limda maydonga tushdi. Bu nima bilan bog‘liq?
— Biz Asilbekni atayin ikkinchi bo‘limga saqlab qo‘ydik. U zaxiradan maydonga tushib o‘yinni kuchaytiradi deb o‘ylagandik va shunday bo‘ldi ham. Bahsni asosiy tarkibda boshlagan Asadbek Karimovning ham harakatlaridan ko‘nglimiz to‘ldi. U kam amaliyotga ega bo‘lmoqda, shu bois maydonda sinab ko‘rishga qaror qildik. Asilbek Jumayev endi olimpiya terma jamoamiz safiga yo‘l oladi va 19 noyabr kuni jamoamizga qaytadi

— Mavsum tugashiga oz qoldi. Rustam Turdimurodov juda yaxshi mavsumni o‘tkazyapti, u kelasi yil ham jamoada qoladimi?
— Men uchun bu haqda gapirish qiyin. Chunki jamoamizda muammolar ko‘p va tez orada bartaraf etilsa kerak. Turdimurodov zo‘r futbolchi va menimcha, barcha jamoalar uni xohlaydi. Hammasi yaxshi bo‘lsa, albatta safimizda olib qolamiz.