Madridning "Real" klubi markaziy himoyachisi Antonio Ryudiger klubini o‘zgartirishi mumkin. Bu haqda jurnalist Florian Plettenberg xabar bermoqda.

Manbaga ko‘ra, "Real" germaniyalik futbolchi bilan mehnat shartnomasini uzaytirmoqchi, ammo hozirda tomonlar o‘rtasida muzokaralar olib borilmayapti. Aloqalar futbolchi jarohatdan tiklanganidan keyin bo‘lishi kutilmoqda.

Shu bilan birga, 32 yoshli Ryudigerga Saudiya Arabistonidan jiddiy qiziqish borligi aytilmoqda. Shuningdek, himoyachining Angliya Premyer-ligasiga qaytishi ham istisno qilinmayapti.

Ryudiger joriy mavsum Ispaniya La Ligasida faqat bitta o‘yinda maydonga tushdi. Futbolchining "Real" bilan shartnomasi kelasi yozda yakuniga yetadi.