"Liverpul"dagilar hali ham yozda Ispaniyada avtohalokatda halok bo‘lgan Diogu Jotani o‘ylayapti.  Bosh murabbiy Arne Slot buni tan oldi. Jamoa portugaliyalikning o‘limi qanchalik kuchli ta’sir qilganini o‘lchay olmaydi, ammo beqaror natijalarni shu bilan izohlashdan bosh tortdi.

"Biz har doim nishonda bo‘lamiz, ba’zida adolatli, ba’zida esa yo‘q. Ammo men Robertsonning ushbu intervyusini jonli ravishda ko‘rdim va bu barchamiz uchun og‘riqli savol ekanligini tushunaman va bu mutlaqo normal holat. Shunday paytlarda xotini va bolalarini o‘ylayman - ularga bizdan ko‘ra yuz chandon og‘ir.

Uni eslash muhim. U g‘ayrioddiy yigit edi. Bu natijalarga qanday ta’sir qilishini o‘lchab bo‘lmaydi. Lekin buni hech qachon bahona qilib o‘tirmayman. Biz uni juda sog‘indik, ammo bu o‘yinda qanchalik aks etganini ayta olmayman", dedi Slot.

Eslatib o‘tamiz, Angliyaning amaldagi chempionlari bu mavsumda 11 o‘yindan so‘ng peshqadam "Arsenal"dan 8 ochko ortda qolib, turnir jadvalining 8-pog‘onasini egallab turibdi.