"Santos" klubi va Braziliya terma jamoasi hujumchisi Neymarning otasi Braziliya matbuoti e’lon qilgan ma’lumotga munosabat bildirdi. Ma’lumotlarga qaraganda, futbolchi menisk jarohati tufayli safdan chiqqan va joriy yilda maydonga tushmaydi.
"Biz uning jarohati haqida hech narsa bilmaymiz. Neymar tibbiy ko‘rikdan o‘tdi, biz hali ham natijalarni kutmoqdamiz. Bu bema’nilik. Biz bunga e’tibor bermaymiz. Agar natija bo‘lmasa, savollarga qanday javob berishim mumkin? Sizlar mendan ko‘ra ko‘proq biladiganga o‘xshaysizlar. Bilganim shuki, u o‘zini noqulay his qilgani uchun tekshiruvdan o‘tkazilgan. Tekshiruv o‘tkazildi, menda hozircha ma’lumot yo‘q, ammo matbuot qaysidir ma’noda men va o‘g‘limdan oldinda," - deya Neymarning otasi so‘zlarini keltiradi TNT Sports.
Neymar joriy mavsum Braziliya chempionatida 17 ta o‘yinda 4 ta gol urdi. Uning klub bilan shartnomasi yil oxirida yakunlanadi.
