Turkiya Superligasi 14-turi doirasida “Istanbul Bashakshehir”ga uchralgan mag‘lubiyat va so‘nggi o‘yinlardagi qoniqarsiz natijalar sababli “Qosimposho” klubi bosh murabbiyi Shota Arveladze bilan shartnoma bekor qilindi.

Murabbiy joriy mavsum boshida jamoa ustoziga aylangan edi. Arveladze “Qosimposho”da 6 oy faoliyat yuritdi. Istanbul klubi joriy mavsum Turkiya Superligasida 3 g‘alaba, 4 durang va 7 mag‘lubiyat qayd etgan holda 14-o‘rinda bormoqda.

Klub so‘nggi bor Shota Arveladze boshqaruvida “Istanbul Bashakshehir”ga qarshi bahs olib bordi va 1:3 hisobida mag‘lub bo‘ldi. Ahamiyatli tomoni shundaki, ushbu o‘yinda O‘zbekiston milliy terma jamoasi futbolchilari Abbosbek Fayzullayev va Eldor Shomurodov bittadan gol urib, “Bashakshehir”ning g‘alabasiga hissa qo‘shdi.

Ma’lumot uchun, Shota Arveladze futbolchilik faoliyati davomida “Dinamo Tbilisi”, “Trabzonspor”, “Ayaks”, “Reynjers”, “AZ Alkmar” va “Levante” klublarida o‘ynagan. U Gruziya futbol tarixidagi eng yaxshi to‘purarlardan biri bo‘lib, klublar miqyosida 410 o‘yinda 291 gol, terma jamoa safida esa 61 o‘yinda 26 gol urgan.

Murabbiy sifatida Arveladze “Qosimposho”, “Kayserspor”, “Trabzonspor”, “Makkabi”, “Xall Siti”, “Fotih Karagumryuk” va “Paxtakor” klublarida ishlagan. Uning boshqaruvida “sherlar” O‘zbekiston Superligasi, Kubogi va Superkubogida g‘alaba qozongan.