2006 yilgi jahon chempioni, oktyabr oyida O‘zbekiston terma jamoasi bosh murabbiyi etib tayinlangan Kannavaro "Tuttosport" nashriga bergan batafsil intervyusida o‘z murabbiylik istiqbollari va yoz faslidagi maqsadlari haqida gapirdi.

Iyun oyida Luchano Spalletti ishdan olingach, Italiya terma jamoasi bosh murabbiyi lavozimiga nomzodlar orasida Kannavaro ham tilga olingan edi. Oxir-oqibat bu vazifa uning sobiq jamoadoshi Jennaro Gattuzoga nasib etdi. Gattuzo mart oyida bo‘lib o‘tadigan JCH pley-off o‘yinlarida «skuadro adzurri»ni maydonga boshlab chiqadi.

Kannavaro Italiya, Polsha va O‘zbekiston haqida: «Kutishdan charchadim»

Kannavaro Tuttosport'ga Italiya terma jamoasi bo‘yicha muzokaralar bo‘lganini, ammo o‘zini haqiqiy nomzod sifatida his qilmaganini aytdi.

«Rostini aytaman. Buffon bilan gaplashganman, lekin amalda men nomzod sifatida ko‘rilmaganman, — dedi Kannavaro. — Futbolchi sifatida o‘tmishim juda ajoyib bo‘lgan, ammo ehtimol, meni ko‘proq plakatdagi qahramon sifatida ko‘rishgandir. Murabbiylikdan voz kechmayman, ishimni davom ettiraman. Gattuzoning tanlovlarini qo‘llab-quvvatlayman, u juda ko‘p o‘rganadigan inson».

Shuningdek, Kannavaro Italiyadagi vaziyatdan keyin Polsha terma jamoasini boshqarish imkoniyati bo‘lganini, ammo u bu taklifni rad etganini ham ma’lum qildi.

«Ha, men bir qadam qolganda “yo‘q” dedim. O‘zimni tayyor his qilmadim va bu xato bo‘ldi, Xitoydan qaytganimdan keyingi eng katta xatom. Balki Italiyani kutib, rad etgandirman. Bu mening g‘oyam edi, ammo hech narsa bo‘lmadi va oxiri kutishdan charchadim».

Shu bilan birga, O‘zbekiston terma jamoasi bosh murabbiyi sifatida Kannavaro jahon chempionatiga yo‘llanmani kafolatlagan, buni esa Gattuzo va Italiya hali uddalamagan.

«O‘sha Germaniyadagi g‘alabadan 20 yil o‘tib, yana jahon chempionatiga qaytaman, — dedi u. — Amerikada bo‘ladigan musobaqada ishtirok etuvchi barcha murabbiylar bilan uchrashuvda bo‘lish juda ajoyib his edi».

O‘zbekistonda ilk uchrashuv qanday o‘tdi?

«Ular meni birinchi marta ko‘rganida hayratda qolishdi. Men ularni tushundim va vaziyatni yengillashtirib, muzni eritdim. Nima uchun saralab olishdan o‘tishganini bilaman. Ular juda chidamli terma jamoa, o‘zbeklar esa irodali xalq.

Menda vaqt juda kam, tezkor yechimlar topishim kerak. Ko‘p o‘yinlarni ko‘rdim, mamlakat bo‘ylab sayohat qildim. Endi chempionat tugadi va biz o‘zbek futbolchilari ishtirok etayotgan boshqa ligalarni kuzatamiz. Ularni har hafta qo‘ng‘iroq qilib holidan xabar olaman, ayniqsa, italyan tilini ancha yaxshi biladigan Shomurodov bilan. U hozir Turkiyada, «Istanbul Bashakshehir»da o‘ynayapti».

Jahon chempionati guruh bosqichida O‘zbekiston Kolumbiya, Portugaliya va ehtimol, DR Kongo bilan bahs olib boradi.

Bu «oson yurish emas» degan fikrga Kannavaro shunday javob berdi:

«Yo‘q, albatta oson emas, lekin o‘sha o‘yinlarga tayyor holda yetib boramiz. Avvalo Kolumbiyaga qarshi o‘ynaymiz. Do‘stim Asprilya allaqachon qo‘ng‘iroq qildim, u menga ba’zi maslahatlar berdi».