"Liverpul" hujumchisi Aleksander Isak APLning 17-turidan o‘rin olgan "Tottenxem"ga (2:1) qarshi bahsda olgan jarohatidan so‘ng muvaffaqiyatli operasiya qilindi.

"Shporlar" himoyachisi Mikki van de Ven mersisaydliklarning o‘yindagi ilk golini urayotgan forvardni "podkat"da yiqitdi. Shundan so‘ng darhol Isakni almashtirishga to‘g‘ri keldi va u shifokorlar yordamida maydonni tark etdi.

"Tashxisdan so‘ng, bugun kichik boldir suyagi sinishi bilan to‘piq jarohati tufayli operasiya qilindi. Isakning reabilitasiyasi mashg‘ulotlar markazida davom etadi, uning qaytish muddati hali aniq emas," - deyiladi klub bayonotida.

26 yoshli shvesiyalik sentyabr oyida "Nyukasl"dan 145 million yevro evaziga "Liverpul"ga o‘tgan edi. Isak mersisaydliklar safida 16 ta o‘yinda maydonga tushib, 3 ta gol urdi va 1 ta golli uzatmani amalga oshirdi.