"Ливерпуль" ҳужумчиси Александер Исак АПЛнинг 17-туридан ўрин олган "Тоттенхэм"га (2:1) қарши баҳсда олган жароҳатидан сўнг муваффақиятли операция қилинди.
"Шпорлар" ҳимоячиси Микки ван де Вен мерсисайдликларнинг ўйиндаги илк голини ураётган форвардни "подкат"да йиқитди. Шундан сўнг дарҳол Исакни алмаштиришга тўғри келди ва у шифокорлар ёрдамида майдонни тарк этди.
"Ташхисдан сўнг, бугун кичик болдир суяги синиши билан тўпиқ жароҳати туфайли операция қилинди. Исакнинг реабилитацияси машғулотлар марказида давом этади, унинг қайтиш муддати ҳали аниқ эмас," - дейилади клуб баёнотида.
26 ёшли швециялик сентябрь ойида "Ньюкасл"дан 145 миллион евро эвазига "Ливерпуль"га ўтган эди. Исак мерсисайдликлар сафида 16 та ўйинда майдонга тушиб, 3 та гол урди ва 1 та голли узатмани амалга оширди.
