Afrika futbol konfederasiyasi Afrika Millatlar kubogi finalidagi mojaro yuzasidan rasmiy bayonot berdi. Sovrin uchun kechgan bahsda Senegal va Marokash terma jamoalari to‘qnash keldi.
O‘yinda hakam Senegalning golini inobatga olmadi, keyin esa uning darvozasiga penalti belgiladi. Senegalliklar murabbiylar shtabi norozilik belgisi sifatida jamoani maydondan olib chiqdi. Ammo keyin Senegal maydonga qaytdi, Marokash penaltini golga aylantira olmadi va senegalliklar g‘alabani ilib ketdi - 1:0.
"Afrika futbol konfederasiyasi kecha kechqurun Rabotda bo‘lib o‘tgan Marokash va Senegal o‘rtasidagi Afrika Millatlar Kubogi finali vaqtida ba’zi futbolchilar va rasmiylarning nomaqbul xatti-harakatlarini qoralaydi.
Tashkilot o‘yinlar paytida har qanday nomaqbul xatti-harakatlarni, ayniqsa hakamlar brigadasi yoki o‘yin tashkilotchilariga qarshi qaratilgan xatti-harakatlarni keskin qoralaydi. Konfederasiya barcha videoyozuvlarni ko‘rib chiqadi va aybdorlarga nisbatan tegishli choralar ko‘rish uchun ishni vakolatli organlarga topshiradi", - deyiladi tashkilot bayonotida.
