FIFA tashkiloti ichida AQSH prezidenti Donald Trampga 2026-yilgi Jahon chempionati qur’asi marosimi chog‘ida “Tinchlik mukofoti” topshirilgani bir xil munosabat bilan qabul qilinmagan.

The Guardian nashri FIFA tizimidagi manbasiga tayanib xabar berishicha, tashkilotning o‘rta va yuqori bo‘g‘inidagi ayrim amaldorlar ushbu qarordan norozi bo‘lgan. Xususan, mukofot egasi qaysi mezonlar asosida tanlangani yuzasidan ochiq izoh berilmagani ko‘pchilikda savollar uyg‘otgan. Trampga mukofot topshirilish paytida FIFA prezidenti Janni Infantino AQSH yetakchisiga murojaat qilib, “biz umid, birlik va kelajakni ko‘rishni istaymiz, bular haqiqiy yetakchidan kutiladigan fazilatlar va siz FIFA Tinchlik mukofotiga loyiqsiz”, degan edi.

Marosimdan keyin AQSH tomonidan qabul qilingan ayrim tashqi siyosiy qarorlar esa FIFA ichidagi norozilikni yanada kuchaytirgan. Jumladan, AQSH Venesuela hududida bir qator havo zarbalarini amalga oshirdi hamda mamlakat prezidenti Nikolas Maduro va uning rafiqasi Siliya Floresni qo‘lga olib, AQSHga olib ketdi. Maduro 5-yanvar kuni sud oldida giyohvand moddalar savdosi, qurol-yarog‘ va “narkoterrorizm” ayblovlari bo‘yicha o‘zini aybsiz deb e’lon qildi. Shuningdek, Tramp Grenlandiyani bosib olish ehtimoli haqida ham bayonot berib, AQSHga bu hudud “juda zarur” ekanini ta’kidlagan. Bu esa keskinlikni yanada oshirgan

Shu bilan birga, FIFA Trampga mukofot berish qarorini himoya qilmoqda. Tashkilot vakili mish-mishlarga izoh berilmasligini bildirar ekan, FIFA har yili tinchlik va birlik yo‘lidagi alohida xizmatlarni e’tirof etish maqsadida ushbu mukofotni topshirishini ta’kidladi.

Ma’lumot o‘rnida, 2026-yilgi Jahon chempionatida 48 ta terma jamoa ishtirok etadi. Musobaqa 11-iyundan 19-iyulgacha AQSH, Kanada va Meksika maydonlarida bo‘lib o‘tadi.