Jahon chempionati kumush medali sovrindori Sharofiddin Lutfullayev Birlashgan Arab Amirliklari dzyudo bo‘yicha o‘smirlar (U-18) va yoshlar (U-21) terma jamoalariga bosh murabbiy etib tayinlandi. Bu haqda O‘zbekiston axborot agentligi xabar berdi.

Mazkur tayinlovga qadar mahalliy mutaxassis O‘zbekiston o‘smirlar terma jamoasi murabbiylar shtabida faoliyat olib borgan. Sharofiddin Lutfullayev Tokio–2020 Olimpiya o‘yinlaridan so‘ng sportchilik faoliyatini yakunlab, to‘liq murabbiylikka o‘tgan edi.

Sharofiddin Lutfullayev O‘zbekiston dzyudosining eng nomdor vakillaridan biri hisoblanadi. U 2019 yil Tokioda bo‘lib o‘tgan Jahon chempionatida −60 kg vazn toifasida kumush medalni qo‘lga kiritgan. Shuningdek, Lutfullayev faoliyati davomida 5 bor Gran-pri turnirlari g‘olibi, 6 karra “Katta dubulg‘a” (Grand Slam) sohibi hamda 3 marta Masters turniri sovrindori bo‘lgan.

Eslatib o‘tamiz, O‘zbekiston dzyudo maktabi xalqaro maydonda yuqori natijalarni namoyish etishda davom etmoqda. Xususan, yaqinda O‘zbekiston o‘smirlar terma jamoasi Indoneziyada o‘tkazilgan Osiyo chempionatida umumjamoa hisobida 1-o‘rinni egallab, 18 ta medalni qo‘lga kiritdi.