2025-yilgi mavsumni Proligada o‘tkazgan «Jayxun» futbol klubi musobaqadagi ishtirokini davom ettiradi.
Qoraqalpog‘iston Respublikasi Jo‘qorg‘i Kengashi «Jayxun» klubining kelgusi taqdiri masalasini muhokamaga qo‘yib, bu borada aniq reja ishlab chiqish bo‘yicha Qoraqalpog‘iston futbol assosiasiyasiga topshiriq bergandi. Assosiasiya yakunda Qoraqalpoq Davlat Universiteti bilan muzokara o‘tkazdi va «Jayxun» futbol klubi faoliyatini universitet negizida davom ettirish masalasida kelishuvga erishdi.
O‘tgan vaqt ichida «Jayxun» futbol klubini Qoraqalpoq davlat universitetining sport klubiga o‘tkazish ishlari amalga oshirildi. Endilikda u «QMU Jayxun» nomi ostida Proligadagi ishtirokini davom ettiradi. Shuningdek, «QMU Jayxun» U19 jamoasi U19 chempionatida ishtirok etadi.
Assosiasiya va Liga bosqichma-bosqich Qoraqalpog‘iston futbolini rivojlantirish strategiyasini amalga tatbiq etib kelmoqda. O‘FA qoshidagi Qoraqalpog‘iston futbol maktabi endilikda «Aral» klubi bilan hamkorlikda ish olib boradi. Maktab tarbiyalanuvchilari «Aral» futbolchilari sifatida Liga ro‘yxatidan o‘tkaziladi. Assosiasiya qoshidagi futbol akademiyasi esa Qoraqalpog‘iston FA sifatida Birinchi ligada to‘p tepadi.
«QMU Jayxun» esa universitet bilan hamkorlikda ish olib boradi. Bu o‘z navbatida qoraqalpog‘istonlik yosh futbolchilarning futbol sir-asrorlarini o‘rganishlari va professional futbolga qadar bo‘lgan mashaqqatli yo‘lni uzilishlarsiz bosib o‘tishlariga xizmat qiladi.
