2025-йилги мавсумни Пролигада ўтказган «Jayxun» футбол клуби мусобақадаги иштирокини давом эттиради.
Қорақалпоғистон Республикаси Жўқорғи Кенгаши «Jayxun» клубининг келгуси тақдири масаласини муҳокамага қўйиб, бу борада аниқ режа ишлаб чиқиш бўйича Қорақалпоғистон футбол ассоциациясига топшириқ берганди. Ассоциация якунда Қорақалпоқ Давлат Университети билан музокара ўтказди ва «Jayxun» футбол клуби фаолиятини университет негизида давом эттириш масаласида келишувга эришди.
Ўтган вақт ичида «Jayxun» футбол клубини Қорақалпоқ давлат университетининг спорт клубига ўтказиш ишлари амалга оширилди. Эндиликда у «QMU Jayxun» номи остида Пролигадаги иштирокини давом эттиради. Шунингдек, «QMU Jayxun» U19 жамоаси U19 чемпионатида иштирок этади.
Ассоциация ва Лига босқичма-босқич Қорақалпоғистон футболини ривожлантириш стратегиясини амалга татбиқ этиб келмоқда. ЎФА қошидаги Қорақалпоғистон футбол мактаби эндиликда «Aral» клуби билан ҳамкорликда иш олиб боради. Мактаб тарбияланувчилари «Aral» футболчилари сифатида Лига рўйхатидан ўтказилади. Ассоциация қошидаги футбол академияси эса Қорақалпоғистон ФА сифатида Биринчи лигада тўп тепади.
«QMU Jayxun» эса университет билан ҳамкорликда иш олиб боради. Бу ўз навбатида қорақалпоғистонлик ёш футболчиларнинг футбол сир-асрорларини ўрганишлари ва профессионал футболга қадар бўлган машаққатли йўлни узилишларсиз босиб ўтишларига хизмат қилади.
