Istanbul Bosh prokuraturasi noqonuniy “stavkalar” va doping bilan bog‘liq ish doirasida 52 nafar gumonlanuvchiga nisbatan ayblov xulosasini tayyorladi. Ularning besh nafari hozirda qamoqda saqlanmoqda. Bu haqda NTV telekanali xabar berdi.

Telekanal ma’lumotiga ko‘ra, ayblov xulosasida gumonlanuvchilar futbol uchrashuvlariga noqonuniy tikishlar qo‘yish hamda doping bilan bog‘liq jinoyatlarda ayblanmoqda. Ayblanuvchilar orasida “Ankaraspor” klubi egasi Ahmet Okatan, klub prezidenti Mehmet Emin Katipo‘g‘lu, shuningdek “Nazillispor” prezidenti Shahin Kaya ham bor.

Hujjatda qayd etilishicha, gumonlanuvchilar natijasi oldindan kelishilgan sport musobaqalarini tashkil etishda ishtirok etgan. Bunda uchrashuvlar natijasi qo‘yilgan tikishlarga mos ravishda ataylab o‘zgartirilgan. Prokuratura ushbu shaxslarga sport musobaqalarida qatnashish va ularni tomosha qilishni taqiqlashni talab qilgan.

Mazkur ish bo‘yicha tergov 2025 yil oktyabr oyida boshlangan. O‘shanda 371 nafar futbol hakamida tikish hisoblari mavjudligi aniqlangan, ularning 152 nafari faol ravishda “stavkalar” qilgani ma’lum bo‘lgan. Istanbul Bosh prokuraturasi tomonidan o‘tkazilgan tintuvlar davomida 21 kishi qo‘lga olingan. Shuningdek, “Eyupspor” klubi prezidenti ham hibsga olingan.

Intizomiy choralar doirasida 149 nafar hakam 8 oydan 12 oygacha faoliyatdan chetlatilgan. Bundan tashqari, Turkiya futbol federasiyasi 124 nafar futbolchini intizom buzilishida ayblagan bo‘lib, ularning 102 nafari 45 kundan 12 oygacha diskvalifikasiya qilingan.