Ademola Lukman madridliklar safidagi ilk o‘yinidayoq "Atletiko" muxlislarini xushnud etdi. Payshanba kuni Diyego Simeone shogirdlari Ispaniya Kubogi 1/4 finalida "Betis"ni yirik hisobda (5:0) mag‘lub etishdi, yangi kelgan hujumchi esa o‘z hisobiga gol va golli uzatmani yozdirib qo‘ydi.

"Men juda xursandman, debyutimdan faxrlanaman. Ayniqsa, jamoamizning bunday ajoyib o‘yin ko‘rsatgani juda yoqimli bo‘ldi. Moslashuv jarayoni oson kechmoqda — jamoadoshlarim bu borada menga ko‘p yordam berishdi. Hamma meni juda iliq kutib oldi va men "Atletiko"da o‘zimni baxtli his qilyapman. Endi ko‘p mehnat qilishda va rivojlanishda davom etishimiz kerak", — dedi 28 yoshli hujumchi o‘yindan keyingi intervyusida.

"Atletiko" Ademola Lukmanni fevral oyi boshida Italiyaning "Atalanta" klubidan sotib olgan edi.