Адемола Лукман мадридликлар сафидаги илк ўйинидаёқ "Атлетико" мухлисларини хушнуд этди. Пайшанба куни Диего Симеоне шогирдлари Испания Кубоги 1/4 финалида "Бетис"ни йирик ҳисобда (5:0) мағлуб этишди, янги келган ҳужумчи эса ўз ҳисобига гол ва голли узатмани ёздириб қўйди.
"Мен жуда хурсандман, дебютимдан фахрланаман. Айниқса, жамоамизнинг бундай ажойиб ўйин кўрсатгани жуда ёқимли бўлди. Мослашув жараёни осон кечмоқда — жамоадошларим бу борада менга кўп ёрдам беришди. Ҳамма мени жуда илиқ кутиб олди ва мен "Атлетико"да ўзимни бахтли ҳис қиляпман. Энди кўп меҳнат қилишда ва ривожланишда давом этишимиз керак", — деди 28 ёшли ҳужумчи ўйиндан кейинги интервьюсида.
"Атлетико" Адемола Лукманни февраль ойи бошида Италиянинг "Аталанта" клубидан сотиб олган эди.
