Xorvatiyalik afsonaviy yarim himoyachi Luka Modrich faoliyatini davom ettirish borasidagi yakuniy qarorini mavsum so‘nggida qabul qiladi. Hozirda uning bor e’tibori "Milan" bilan A Seriya chempionligini qo‘lga kiritishga qaratilgan.

"Modrichning shartnomasi iyun oyida tugaydi. Uni uzaytirish varianti mavjud. Ammo hozircha u bor e’tiborini bugungi kunga qaratgan. U "Milan" bilan biror sovrin yutishni va shundan so‘ng yaqin kelajagi haqida xotirjam o‘ylab ko‘rishni istaydi", — deya Morettoning so‘zlaridan iqtibos keltirmoqda pianetamilan.it.

Eslatib o‘tamiz, hozirda "Milan" Italiya chempionati turnir jadvalida ikkinchi o‘rinni egallab turibdi va peshqadam "Inter"dan besh ochko ortda qolmoqda. Boshqa turnirlarda klub o‘z ishtirokini yakunlagan.