Madridning «Real» klubi hujumchisi Kilian Mbappe «Valensiya»ga qarshi bahsda (2:0) gol urib, o‘z sermahsul seriyasini davom ettirdi.

27 yoshli futbolchi «ko‘rshapalaklar» darvozasini 91-daqiqada ishg‘ol qilib, yakuniy hisobni o‘rnatdi. Fransiyalik hujumchi ketma-ket oltita uchrashuvdan beri maydonni golsiz tark etmayapti.

«Mbappe — dunyoning eng yaxshi o‘yinchisi. U buni har kuni isbotlamoqda», — deya bayonot berdi «Real» bosh murabbiyi Alvaro Arbeloa matbuot anjumanida.

Kilian Mbappe 23 ta gol bilan La Liga to‘purarlar poygasida peshqadamlik qilmoqda. Umumiy hisobda esa «qaymoqranglilar» yulduzi joriy mavsumdagi barcha musobaqalarda 31 ta o‘yinda maydonga tushib, 38 ta gol urishga muvaffaq bo‘ldi.