«Milan»ning sobiq himoyachisi, gruziyalik futbolchi Kaxa Kaladze portugal hujumchisi Rafael Leau jamoa uchun juda zarur ekanligiga va u «alohida» futbolchilar toifasiga kirishiga shubha qilmayapti. Eslatib o‘tamiz, Leau Italiyaga ancha oldin — 2019 yilda ko‘chib o‘tgan edi.

«Italiyada uni tanqid qilishni juda yaxshi ko‘rishadi, men bundan xabardorman. Ammo u ham jismoniy, ham texnika jihatidan juda kuchli. Agar klub yana g‘alabalarga qaytmoqchi bo‘lsa, Leauni «Milan» uchun eng muhim bo‘g‘in deb hisoblayman. Bunga hech qanday shubha yo‘q», — deya Kaladzening so‘zlarini keltirmoqda «pianetamilan.it».

Ma’lumot uchun, Kaxa Kaladze 2001 yildan 2010 yilgacha «Milan» sharafini himoya qilgan. Hozirda sobiq futbolchi Gruziya poytaxti — Tbilisi shahri meri lavozimida faoliyat yuritmoqda.