Londonning «Arsenal» klubi bosh murabbiyi Mikel Arteta Bukayo Sakani yangi pozisiyada ko‘rmoqda.
Ispaniyalik mutaxassis yakshanba kuni Angliya Kubogi doirasida «Uigan»ga qarshi kechgan va 4:0 hisobidagi g‘alaba bilan yakunlangan o‘yinda vingerni hujumchi ortida — markazda sinab ko‘rdi.
«Kelgusida Bukayoni markazda ishlatishimizni to‘liq istisno qilmayman. Oldinda o‘yinlar ko‘p va biz bu variantni yodda tutyapmiz. Ushbu pozisiya unga darvozaga yaqinroq bo‘lish imkonini beradi va raqiblarning ishini qiyinlashtiradi. Shuningdek, u qanot o‘yinchilari bilan pozisiya almashishda ham juda faol», — deya jurnalist Konnor Xamm Artetaning so‘zlarini keltirmoqda.
Bukayo Saka «Uigan» bilan bahsda bir bo‘lim o‘ynadi. Tanaffusga qadar hisob allaqachon yakuniy ko‘rinishga kelib bo‘lgandi va ingliz futbolchisi Viktor Dyokereshga almashtirildi.













