"Arsenal" ustozi Mikel Arteta ijtimoiy tarmoqlarda tarqalgan videodan so‘ng tanqidlar ostida qoldi. Lavhada murabbiy muxlisning imzo haqidagi iltimosiga qaramay, avtomobili oynasini tushirmagani aks etgan. Arteta yuzaga kelgan vaziyatni izohlab berdi.
"Men imkon qadar hurmat saqlashga harakat qilaman. Avtograf berishni va suratga tushishni yaxshi ko‘raman. Buni ishimizning bir qismi deb hisoblayman. Biroq biz rioya qilishimiz shart bo‘lgan xavfsizlik masalalari bor. Bu borada allaqachon salbiy misollar bo‘lgan", - dedi Arteta jurnalistlarga.
"Goal" portalining qayd etishicha, bir necha yil oldin "Arsenal" xavfsizlik protokollarini yangilagan hamda xavfli hududlarda muxlislar yaqinlashsa, futbolchi va murabbiylarga mashina oynalarini tushirmaslikni tavsiya qilgan.
