"Арсенал" устози Микель Артета ижтимоий тармоқларда тарқалган видеодан сўнг танқидлар остида қолди. Лавҳада мураббий мухлиснинг имзо ҳақидаги илтимосига қарамай, автомобили ойнасини туширмагани акс этган. Артета юзага келган вазиятни изоҳлаб берди.
"Мен имкон қадар ҳурмат сақлашга ҳаракат қиламан. Автограф беришни ва суратга тушишни яхши кўраман. Буни ишимизнинг бир қисми деб ҳисоблайман. Бироқ биз риоя қилишимиз шарт бўлган хавфсизлик масалалари бор. Бу борада аллақачон салбий мисоллар бўлган", - деди Артета журналистларга.
"Goal" порталининг қайд этишича, бир неча йил олдин "Арсенал" хавфсизлик протоколларини янгилаган ҳамда хавфли ҳудудларда мухлислар яқинлашса, футболчи ва мураббийларга машина ойналарини туширмасликни тавсия қилган.
