Angliya Premyer-ligasida chempionlik poygasi yanada qizg‘in tus oldi — «Arsenal» shu haftada «Vulverxempton» bilan o‘yinda (2:2) ochko yo‘qotdi. Xosep Gvardioladan raqobatchining bu xatosini o‘z shogirdlari bilan muhokama qilgani yoki yo‘qligi haqida so‘rashdi.
«Bu haqda bir soniya ham gapirganim yo‘q. Faqat «Nyukasl», «Nyukasl» va yana «Nyukasl». Men futbolchilarga turnir jadvalidagi holat yoki shunga o‘xshash narsalar haqida gapirmadim. Buning menga farqi yo‘q. Oldinda hali 12 ta o‘yin bor. Agar siz bu savolni mavsum tugashiga ikki yoki uch tur qolganda bersangiz, o‘shanda javobim bo‘ladi. 12 ta o‘yin — bu butun bir abadiyat demakdir», — dedi Gvardiola matbuot anjumanida.
«Manchester Siti» — «Nyukasl» uchrashuvi 21 fevral kuni Toshkent vaqti bilan soat 23:00 da boshlanadi.
