«Real» himoyachisi Din Xyoysen osiyolik ijtimoiy tarmoq foydalanuvchilari irqchilik deb baholagan memni repost qilgani uchun uzr so‘radi.

20 yoshli futbolchi o‘z sahifasida osiyolik shaxsning surati va internet foydalanuvchilarining ikkita sharhi tushirilgan skrinshotni ulashgan. Sharhlarda «hatto xitoyliklar ham uni xitoylik deb atashmoqda» va «uning ko‘zlarini tish ipi bilan bog‘lab qo‘ysa bo‘ladi» degan so‘zlar yozilgan edi. Keyinroq ispaniyalik futbolchi ushbu postni o‘chirib tashladi.

«Men xitoylik do‘stlarimdan chin qalbdan uzr so‘rayman. Avvalroq men bilmasdan haqoratli mazmundagi kontentni ulashgan edim.

Bu mutlaqo tasodifan sodir bo‘ldi va sizlarda salbiy hissiyotlar uyg‘otganimdan afsusdaman», – deyiladi Xyoysenning «Real» klubi Xitoyning Weibo platformasida e’lon qilgan bayonotida.