«Реал» ҳимоячиси Дин Хёйсен осиёлик ижтимоий тармоқ фойдаланувчилари ирқчилик деб баҳолаган мемни репост қилгани учун узр сўради.

20 ёшли футболчи ўз саҳифасида осиёлик шахснинг сурати ва интернет фойдаланувчиларининг иккита шарҳи туширилган скриншотни улашган. Шарҳларда «ҳатто хитойликлар ҳам уни хитойлик деб аташмоқда» ва «унинг кўзларини тиш ипи билан боғлаб қўйса бўлади» деган сўзлар ёзилган эди. Кейинроқ испаниялик футболчи ушбу постни ўчириб ташлади.

«Мен хитойлик дўстларимдан чин қалбдан узр сўрайман. Аввалроқ мен билмасдан ҳақоратли мазмундаги контентни улашган эдим.

Бу мутлақо тасодифан содир бўлди ва сизларда салбий ҳиссиётлар уйғотганимдан афсусдаман», – дейилади Хёйсеннинг «Реал» клуби Хитойнинг Weibo платформасида эълон қилган баёнотида.