Shvesiya terma jamoasi bosh murabbiyi Grem Potter Londonning «Arsenal» klubi hujumchisi Viktor Dyokeresh o‘z sha’niga aytilgan tanqidlardan to‘g‘ri xulosa chiqargan deb hisoblaydi.

«To‘pchilar» o‘tgan yilning yozida forvardni Lissabonning «Sporting» klubidan sotib olgan edi. Shved futbolchisi gol urish borasidagi ko‘rsatkichlari yuqori emasligi uchun tez-tez tanqid qilindi, jamoa ustozi Mikel Arteta esa vaqti-vaqti bilan uning o‘rniga boshqa futbolchilarni afzal ko‘rdi.

«Tanqidlar Viktorga foyda berdi. Menimcha, bu uning xarakteri naqadar kuchli ekanligini anglatadi. Shaxsan men Dyokereshga zarracha shubha qilmayman — u yuqori toifadagi o‘yinchi va ajoyib inson. U «Arsenal»ning to‘rttala turnirdagi muvaffaqiyatiga o‘z hissasini qo‘shdi deb hisoblayman. Har qanday futbolchi ba’zan tanqidlarga duch kelishi tabiiy — bu kasbning bir qismidir», — deya Potterning so‘zlaridan iqtibos keltirmoqda «Arsenal News Channel».

Viktor Dyokeresh joriy mavsumda «Arsenal» safida 36 ta o‘yinda maydonga tushib, 15 ta gol urdi va ikkita golli uzatmani amalga oshirdi.