Domeniko Tedesko «Fenerbaxche» klubiga kelganidan so‘ng Turkiya chempionatidagi mag‘lubiyatsiz seriyasi davomiyligi bo‘yicha murabbiylar o‘rtasidagi rekordni yangiladi.

Turkiya Superligasining 24-turida Istanbul klubi safarda «Antalyaspor»ga qarshi bahsda 63-daqiqagacha 0:2 hisobida imkoniyatni boy berayotgan edi, biroq uchrashuvni durang (2:2) bilan yakunlashga muvaffaq bo‘ldi.

Shu tariqa, Tedesko tayinlanganidan beri «Fenerbaxche» mamlakat chempionatida 21 ta o‘yindan beri mag‘lub bo‘lmayapti — 13 ta g‘alaba va 8 ta durang. Shu tariqa, Tedesko klubga kelganidan keyingi eng uzoq mag‘lubiyatsiz seriya bo‘yicha Oskar Xoldning rekordini (1964 yil oktyabrdan 1965 yil fevralgacha bo‘lgan 19 ta o‘yin) yangiladi.

Qayd etish joizki, Tedeskoning o‘zi o‘yinni o‘tkazib yubordi. Klubning xabar berishicha, virus tufayli tana harorati ko‘tarilgan Domeniko shifokorlar nazoratida qolgan.

«Fenerbaxche» Turkiya chempionatida 24 ta o‘yindan so‘ng 54 ochko jamg‘arib, ikkinchi o‘rinda bormoqda. «Galatasaroy» 58 ochko bilan peshqadamlik qilmoqda.