Londonning «Tottenxem» klubi o‘z yarim himoyachisi Archi Greyni Madridning «Real» klubiga yoki boshqa jamoalarga qo‘yib yubormoqchi emas. Bu haqda jurnalist Ekrem Konur xabar bermoqda.

Manbaning ma’lumotlariga ko‘ra, «Tottenxem» Greyni nafaqat kelajakdagi, balki hozirgi vaqtdagi muhim o‘yinchi deb hisoblaydi. Klub uni sotishni rejalashtirmayapti va uni jamoada saqlab qolish uchun zarur choralarni allaqachon ko‘rmoqda. Qayd etilishicha, 19 yoshli xavbekning harakatlarini «Real» va «Bavariya» klublari sinchkovlik bilan kuzatib bormoqda.

2024 yilning yozida «shporlar» Greyni «Lids»dan 40 million yevrodan ko‘proq mablag‘ evaziga sotib olgan edi. Futbolchi klub bilan olti yillik shartnoma imzolagan.

Joriy mavsumda Grey barcha musobaqalarda jami 27 ta o‘yinda ishtirok etdi, ikkita gol urdi va o‘z hisobiga bitta golli uzatmani yozdirib qo‘ydi.