Лондоннинг «Тоттенхэм» клуби ўз ярим ҳимоячиси Арчи Грэйни Мадриднинг «Реал» клубига ёки бошқа жамоаларга қўйиб юбормоқчи эмас. Бу ҳақда журналист Экрем Конур хабар бермоқда.
Манбанинг маълумотларига кўра, «Тоттенхэм» Грэйни нафақат келажакдаги, балки ҳозирги вақтдаги муҳим ўйинчи деб ҳисоблайди. Клуб уни сотишни режалаштирмаяпти ва уни жамоада сақлаб қолиш учун зарур чораларни аллақачон кўрмоқда. Қайд этилишича, 19 ёшли хавбекнинг ҳаракатларини «Реал» ва «Бавария» клублари синчковлик билан кузатиб бормоқда.
2024 йилнинг ёзида «шпорлар» Грэйни «Лидс»дан 40 миллион евродан кўпроқ маблағ эвазига сотиб олган эди. Футболчи клуб билан олти йиллик шартнома имзолаган.
Жорий мавсумда Грэй барча мусобақаларда жами 27 та ўйинда иштирок этди, иккита гол урди ва ўз ҳисобига битта голли узатмани ёздириб қўйди.
