"Olimpiakos" hujumchisi Mehdi Taremi Yaqin Sharqdagi mojarolar fonida Eronga qaytishni rejalashtirmayapti.

Italiyaning Tuttosport nashri seshanba kuni Taremi shanba kuni Isroil va Amerika aviazarbalariga uchragan o‘z vataniga yordam berish uchun Eronga qaytish niyatida ekani haqida xabar tarqatgan edi. Dastlabki ma’lumotlarga ko‘ra, Mehdi Taremi Eronda demokratiya o‘rnatish uchun kurashishga tayyor bo‘lgan.

Hujumchining agenti Federiko Pastorello o‘z ijtimoiy tarmoqlarida ushbu taxminni rad etdi.

"So‘nggi soatlarda Mehdi Taremiga nisbat berilayotgan, ammo mavjud vaziyatni aks ettirmaydigan bayonotlar tarqalmoqda. Futbolchi bor e’tiborini Afinadagi faoliyatiga va professional karyerasiga qaratgan bo‘lib, o‘z ishiga sodiqlik va qat’iyat ko‘rsatmoqda. Ushbu murakkab davrda kontekstdan yulib olingan talqinlardan yoki noaniq talqinlardan qochish muhimdir. Biz barchaning mas’uliyat hissiga va o‘zaro hurmatga ishonamiz", – deb yozdi Pastorello ijtimoiy tarmoqda.