«Liverpul» sardori Virgil van Deyk jamoaning kelasi mavsumda Chempionlar ligasidan chetda qolish ehtimoli haqida fikr bildirdi.

«Bu yozgi transfer oynasiga 100 foiz ta’sir qiladi. To‘siqlar juda baland. Quloq soling, agar siz «Liverpul»da o‘ynayotgan bo‘lsangiz, doimo Chempionlar ligasida ishtirok etishingiz shart. Biz YECHL yo‘llanmasini qo‘lga kiritishimiz kerak», — deya van Deykning so‘zlarini keltiradi jurnalist Fabrisio Romano.

Avvalroq «Liverpul» Angliya Premyer-ligasining 29-turida sensasion tarzda «Vulverxempton»ga (1:2) imkoniyatni boy bergan edi. Ayni damda mersisaydliklar turnir jadvalida 48 ochko bilan oltinchi pog‘onani egallab turishibdi.

Eslatib o‘tamiz, Angliyadan Chempionlar ligasiga dastlabki beshta klub yo‘llanma oladi (Evrokuboklardagi muvaffaqiyatli ishtirok evaziga Angliya uchun kvota beshtagacha kengaytirilgan).