«Barselona» futbolchisi Fermin Lopes La Liga doirasida «Atletik» Bilbaoga qarshi kechgan o‘yindan (1:0) so‘ng intervyu berdi.

Kataloniyaliklarga g‘alabani 68-daqiqada Lamin Yamal tomonidan yo‘llangan aniq zarba taqdim etdi. Seshanba kuni Xans-Diter Flik jamoasini yana bir qiyin safar kutmoqda — «ko‘k-anorranglilar» Chempionlar ligasi 1/8 finalida Angliyaning «Nyukasl» jamoasi bilan kuch sinashadilar.

«Qiyin o‘yin bo‘ldi, lekin biz yaxshi himoyalandik. Natijadan juda xursandmiz. Rostini aytsam, biz juda charchaganmiz. O‘yinlar orasida tiklanish uchun vaqtimiz juda kam — ayniqsa, bor kuchimizni bergan seshanba kungi «Atletiko»ga qarshi bahsdan keyin ancha qiyin bo‘lmoqda. Hozir biz allaqachon «Nyukasl» haqida o‘ylayapmiz», — deya Fermin Lopesning so‘zlarini keltirmoqda Barca Universal.

«Barselona» 67 ochko bilan La Liga turnir jadvalida birinchi o‘rinda bormoqda. Madridning «Real» klubi bilan oradagi farq to‘rt ochkoni tashkil etadi.