O‘zbekiston ayollar terma jamoasi 2026 yilgi Osiyo Kubogida uchinchi uchrashuvini o‘tkazdi. Ushbu bahsdagi yirik hisobda qozonilgan g‘alaba evaziga jamoa o‘z tarixida ilk bor pley-off bosqichiga yo‘llanmani qo‘lga kiritdi. Bunga qadar O‘zbekiston ayollar terma jamoasi musobaqada 5 marta ishtirok etib, har safar guruh bosqichidayoq o‘z ishtirokini yakunlagan.

“B” guruhidan joy olgan Kotrina Kulbite boshqaruvidagi jamoa 3-turda Bangladeshga qarshi bahs olib bordi. Uchrashuv 4:0 hisobida Kotrina Kulbite boshqaruvidagi O‘zbekiston ayollar terma jamoasining g‘alabasi bilan yakunlandi.

Gollarga 10-daqiqada Diyoraxon Habibullayeva, 62 va 66-daqiqada Dildora Nozimova, 88-daqiqada Nilufar Qudratova mualliflik qildi.

Guruhda, shuningdek, Xitoy 2:1 hisobida Shimoliy Koreyani mag‘lub etdi va guruhda 1-o‘rinni egalladi.

3-tur yakunlariga ko‘ra, O‘zbekiston 4 ta gol urib, o‘z darvozasidan 6 ta gol o‘tkazib yuborgan. “A” guruhida 3-o‘rinni egallagan Filippin futbolchilari esa 2 ta gol urgan va 4 ta o‘tkazib yuborgan.

Musobaqa reglamentiga ko‘ra, ikki jamoa o‘rtasidagi ko‘rsatkich solishtirilganda avval ochkolar soni, ular teng kelgan taqdirda to‘plar nisbatiga e’tibor qaratiladi. Bunda urilgan gollar ustunlik taqdim etadi. Shu sabab O‘zbekiston ayollar terma jamoasi “C” guruhida qanday natija qayd etilishidan qat’i nazar 1/4 final ishtirokchisiga aylandi. Filippinning taqdiri esa ertaga, 10 mart kuni o‘tkaziladigan “C” guruhi o‘yinlaridan so‘ng ma’lum bo‘ladi.

2026 yilgi ayollar o‘rtasidagi Osiyo Kubogida ishtirok etuvchi 12 ta terma jamoa 3 ta guruhga bo‘lingan holda bahslarga kirishgan. Guruhlarda dastlabki ikki o‘rinni egallagan jamoalar hamda eng yaxshi ko‘rsatkich qayd etgan ikki nafar uchinchi o‘rin sohibi chorak finalga yo‘l oladi.

Ma’lumot uchun, turnir 2027 yilda Braziliyada o‘tkaziladigan FIFA ayollar o‘rtasidagi Jahon chempionati uchun Osiyo mintaqasidagi yakuniy saralash bosqichi vazifasini bajaradi. Shu bilan birga, bu Jahon chempionati saralashi Osiyo Kubogi bilan bog‘langan so‘nggi musobaqa bo‘ladi — 2031 yildan boshlab FIFA ayollar o‘rtasidagi Jahon chempionati uchun alohida saralash turniri o‘tkazilishi rejalashtirilgan.

Bundan tashqari, tarixda ilk bor ushbu musobaqa 2028 yil Los-Anjelesda bo‘lib o‘tadigan Yozgi Olimpiya o‘yinlari uchun Osiyo saralashining dastlabki bosqichi sifatida ham xizmat qiladi. Turnirning chorak finaliga chiqqan sakkiz jamoa 2028 yilgi Olimpiya o‘yinlari saralash turniriga yo‘llanma oladi.

Eslatib o‘tamiz, 2029 yilgi ayollar o‘rtasidagi Osiyo Kubogiga O‘zbekiston mezbonlik qiladi.