Iroq terma jamoasi bosh murabbiyi Grem Arnold FIFAga murojaat qilib, Iroqqa yordam berishni so‘radi. Qo‘shni Eron va AQSH o‘rtasidagi ziddiyat jamoaning Jahon chempionati saralashidagi ishtirokini xavf ostida qoldirmoqda.

31 mart kuni Meksikada Iroq terma jamoasining Surinam va Boliviya o‘rtasidagi pley-off g‘olibiga qarshi uchrashuvi bo‘lib o‘tishi kerak. Ushbu o‘yin natijasi Iroqning 1986 yildan beri ilk bor Jahon chempionatiga chiqish-chiqmasligini hal qiladi.

«Iltimos, ushbu o‘yin borasida bizga yordam bering, chunki hozir biz futbolchilarimizni Iroqdan olib chiqishga qiynalyapmiz.

Mening fikrimcha, agar FIFA o‘yinni qoldirsa, bu bizga yaxshilab tayyorgarlik ko‘rish uchun vaqt beradi. Mayli, Boliviya shu oyda Surinam bilan o‘ynasin, biz esa Jahon chempionati boshlanishidan bir hafta oldin AQSHda g‘olib jamoa bilan to‘qnashamiz — bu o‘yin g‘olibi qoladi, mag‘lub esa uyiga yo‘l oladi.

Shuningdek, bu FIFAga Eron nima qilishini hal qilishi uchun ko‘proq vaqt beradi. Agar Eron ishtirok etishdan bosh tortsa, biz Jahon chempionatiga yo‘l olamiz. Bu esa biz saralash turnirida mag‘lub etgan BAA terma jamoasiga yo Boliviya, yoki Surinamga qarshi tayyorgarlik ko‘rish imkoniyatini beradi», — dedi Arnold AAP agentligiga bergan intervyusida.