Madridning «Real» klubi yarim himoyachisi Tyago Pitarch hozircha qaysi milliy terma jamoa sharafini himoya qilishni tanlay olmayapti.

18 yoshli futbolchi ham Ispaniya, ham Marokash terma jamoalarida o‘ynash huquqiga ega. So‘nggi vaqtlarda xavbek «qaymoqranglilar»ning asosiy tarkibida muntazam ko‘rinish bermoqda, shu sababli jurnalistlar unga terma jamoa tanlovi haqida savol berishdi.

«Ispaniya yoki Marokash? Hali bir qarorga kelmadim. Braim [Dias] menga Marokash terma jamoasi haqida ko‘p gapirib beradi — u yerda o‘zini juda qulay his qilayotganini aytdi», — deya Pitarchning so‘zlarini keltirmoqda «Madrid Zone».

«Qirollik klubi»ning yosh tarbiyalanuvchisi avvalroq Ispaniyaning o‘smirlar va yoshlar terma jamoalarida to‘p surgan. «Real»ning asosiy jamoasi safida u shu kungacha besh bor maydonga tushdi va bu o‘yinlarning barchasi oxirgi ikki oy ichida sodir bo‘ldi.