Мадриднинг «Реал» клуби ярим ҳимоячиси Тьяго Питарч ҳозирча қайси миллий терма жамоа шарафини ҳимоя қилишни танлай олмаяпти.
18 ёшли футболчи ҳам Испания, ҳам Марокаш терма жамоаларида ўйнаш ҳуқуқига эга. Сўнгги вақтларда хавбек «қаймоқранглилар»нинг асосий таркибида мунтазам кўриниш бермоқда, шу сабабли журналистлар унга терма жамоа танлови ҳақида савол беришди.
«Испания ёки Марокаш? Ҳали бир қарорга келмадим. Браим [Диас] менга Марокаш терма жамоаси ҳақида кўп гапириб беради — у ерда ўзини жуда қулай ҳис қилаётганини айтди», — дея Питарчнинг сўзларини келтирмоқда «Madrid Zone».
«Қироллик клуби»нинг ёш тарбияланувчиси аввалроқ Испаниянинг ўсмирлар ва ёшлар терма жамоаларида тўп сурган. «Реал»нинг асосий жамоаси сафида у шу кунгача беш бор майдонга тушди ва бу ўйинларнинг барчаси охирги икки ой ичида содир бўлди.
