«Milan» yulduzlari Rafael Leau va Kristian Pulishich o‘rtasida A Seriyaning 29-turi doirasidagi «Lasio»ga qarshi o‘yindan (0:1) so‘ng kelishmovchilik yuzaga keldi.
Portugaliyalik futbolchi 66-daqiqada zaxiraga olinganidan so‘ng g‘azabini yashira olmadi — jamoa bosh murabbiyi Massimiliano Allegri uni quchoqlab qo‘ymoqchi bo‘lganida, u ikki bor o‘zini chetga oldi va murabbiyga nimalarnidir aytib e’tiroz bildirdi.
La Gazzetta dello Sport nashrining yozishicha, Leau Pulishichning ikkita vaziyatda unga pas bermaganidan norozi bo‘lgan. O‘sha vaziyatlarda Rafael «Lasio» himoyachisi Adam Marushichning ortidan bo‘sh hududga ochilgan edi. Leau maydondayoq faol ravishda qo‘llari bilan noroziligini ko‘rsatdi va kiyinish xonasida ham sherigiga e’tiroz bildirishda davom etdi. Vaziyatni yumshatish uchun Allegri aralashishiga to‘g‘ri keldi.
Hozirda «Milan» Italiya chempionati turnir jadvalida 60 ochko bilan 2-o‘rinda bormoqda va peshqadam «Inter»dan 8 ochkoga ortda qolmoqda.
