«Милан» юлдузлари Рафаэл Леау ва Кристиан Пулишич ўртасида А Сериянинг 29-тури доирасидаги «Лацио»га қарши ўйиндан (0:1) сўнг келишмовчилик юзага келди.
Португалиялик футболчи 66-дақиқада захирага олинганидан сўнг ғазабини яшира олмади — жамоа бош мураббийи Массимилиано Аллегри уни қучоқлаб қўймоқчи бўлганида, у икки бор ўзини четга олди ва мураббийга нималарнидир айтиб эътироз билдирди.
La Gazzetta dello Sport нашрининг ёзишича, Леау Пулишичнинг иккита вазиятда унга пас бермаганидан норози бўлган. Ўша вазиятларда Рафаэл «Лацио» ҳимоячиси Адам Марушичнинг ортидан бўш ҳудудга очилган эди. Леау майдондаёқ фаол равишда қўллари билан норозилигини кўрсатди ва кийиниш хонасида ҳам шеригига эътироз билдиришда давом этди. Вазиятни юмшатиш учун Аллегри аралашишига тўғри келди.
Ҳозирда «Милан» Италия чемпионати турнир жадвалида 60 очко билан 2-ўринда бормоқда ва пешқадам «Интер»дан 8 очкога ортда қолмоқда.
