«Galatasaroy» hujumchisi Viktor Osimxen jarrohlik amaliyotini o‘tkazadi. Chempionlar ligasi doirasida «Liverpul»ga qarshi kechgan bahsda nigeriyalik futbolchining qo‘li singan.

Osimxenga jarrohlik aralashuvi zarurligi haqida taniqli jurnalist Yag‘iz Sabunjuog‘lu ijtimoiy tarmoqlarda xabar berdi.

2025/2026 yilgi mavsumda Osimxen jami 29 ta rasmiy uchrashuvda maydonga tushib, o‘z hisobiga 19 ta gol va yettita golli uzatmani yozdirib qo‘yishga muvaffaq bo‘lgan edi.

Ta’kidlash joizki, «Galatasaroy» ayni damda Turkiya chempionati turnir jadvalida peshqadamlik qilmoqda. «Arslonlar» bitta zaxira o‘yiniga ega bo‘lgan holda, ta’qibchilari — «Fenerbaxche» va «Trabzonspor»dan to‘rt ochko oldinda bormoqdalar.